日本殿堂級動畫《新世紀福音戰士》嘅周邊商品一向係銷量保證，適逢劇場版最終章喺今年播出，官方就順勢推出一系列聯乘產品，手錶、便當，甚至電單車頭盔都有！近日官方就同日本内衣品牌TOOT合作，推出覺醒初號機Boxer，唔知著咗係咪都會覺醒暴走呢？

據官方介紹，呢款Boxer參照咗初號機覺醒時嘅紅紫配色，採用彈性良好、質地光滑嘅尼龍布料製成，透氣又舒適即使出汗都唔會焗住，而且仲係Made in JAPAN！售價為7,150日圓（約HKD$490），有興趣嘅朋友可以到TOOT官網以及EVANGELION STORE訂購。