由Dwayne Johnson及Chris Evans聯手主演嘅動作喜劇《Red One》原定去年聖誕節檔期上映，目前已推遲至今年11月上映。雖然外界認為係去年荷里活罷工潮所致，但最近有消息指，實際原因其實係Dwayne Johnson經常遲到並且缺乏專業精神，影響了拍攝進度，導致製作成本至少增加5,000萬美元。

近日外媒《TheWrap》引述十多名知情人士透露，指Dwayne Johnson拍攝《Red One》期間平均每日遲到7-8小時，有時甚至直接缺席，導致製作成本至少增加5,000萬美元，最終預算達2.5億美元，堪比一部超級英雄電影。與此同時，有份製作《Ballers（好球天團）》及《Rampage（末日困獸戰）》嘅知情人士亦證實Dwayne Johnson經常遲到之說，並表示拍攝行程表上永遠見唔到Dwayne Johnson嘅通告時間，而佢亦拒絕一日內拍攝超過4、5小時。

除咗例牌遲到，知情人士更指Dwayne Johnson拍攝時為求方便，經常有廁所唔用，直接用膠水樽小便，再由助理幫忙處理，引起在場工作人員不滿。

報導出街後引起網絡熱烈討論，其中有支持Dwayne Johnson嘅消息人士就表示，佢最多只係遲到一個鐘，又指電影預算有15%嘅波動係平常事。而電影公司亦發聲明表示：「Dwayne Johnson同製片商Seven Bucks喺《Red One》合作得好好，呢部電影將會喺假期檔深受全年齡觀眾喜愛，而且試片反應相當好，CinemaCon嘅迴響就係好例子，如果冇Dwayne Johnson嘅努力同支持，我哋根本無法完成。任何指佢喺片場遲到7至8小時嘅報導都係不實又荒謬。」

資料來源：TheWrap、forbes