2018印尼雅加達亞運正進行得如火如荼，其中游泳項目方面已經相繼進行決賽決出獎牌誰屬。而作為中國隊男子隊主力，奧運三金得主嘅孫楊亦表現對辦，喺男子200米自由泳成功奪得自己今屆亞運第一冠，不過正當佢高興領獎之際，升國旗期間竟然發生小插曲。

今屆亞運男子200米自由泳決賽中，游第4線道嘅孫楊喺頭100米一直都落後僅排第4位，但後段發力狂追，喺最後50米進佔領先位置，最後以1分45秒43奪得冠軍，而亞軍係日本選手江原騎士，季軍則同樣係中國嘅季新傑。

奪得自己游泳生涯首面亞運200米自由泳金牌嘅孫楊心情大好，喺頒獎台上笑面迎人，但呢個時候卻發生令人尷尬嘅情況，就係奏國歌升國旗嘅時候，三面國旗連旗桿竟然突然跌落地，升旗儀式隨即中斷。

見證住意外發生嘅孫楊，難以置信地掩面，臉色非常難看，其後主動走落頒獎台向大會要求重新播一次國歌，將整個儀式重黎一次，期間佢連續向負責人士講左三次「one more time」。可惜嘅係，大會工作人員嘗試維修旗桿不果，國旗唔能夠升上半空，只能夠維持喺離地一點點嘅位置，場面尷尬。

而其後嘅頒獎儀式旗桿仍然未能夠修復好，而大會索性用人手拎住國旗，其中負責拎住季軍中國國旗嘅工作人員屈膝嘅動作令人哭笑不得，尷尬到無朋友。唔知習大大見到呢一幕之後，會唔會同印尼方面傾下計呢？