「勝者為王，敗者為寇」大部份都係競技比賽嘅現實，而世界盃亦都一樣，無論你曾經表現幾好，有幾多輝煌嘅成就，只要你落敗就等同於失敗。不過，有時候亦都有例外的，就好似岩岩被比利時踢出局嘅日本隊就係一個例子。

日本隊16強面對強大嘅比利時，喺幾乎一面倒被看淡嘅情況下，竟然喺下半場先入兩球領先，雖然最終喺手握極大優勢下被對方連追三球反勝，但係日本奮戰至最後一秒嘅精神卻獲得全世界球迷嘅讚賞。

而被絕殺出局正常情況下球隊上下都會士氣低落，甚至完全失去精神及動力。不過，日本卻再一次令世界感到驚訝，因為除左佢地到現場睇波嘅球迷再一次賽後幫忙清理現場垃圾之外，連球員更衣室亦都一樣！

一位FIFA工作人員就喺日本隊出局後發佈出日本隊當日賽後更衣室嘅情況，可以睇到被淘汰出局緣盡今屆世界盃嘅日本更衣室賽後乾淨到好似新嘅一樣，地板甚至被清潔到反光的。除此之外，日本隊離開前更留下一句俄文紙條「多謝」，以對當地工作人員嘅感恩之情。

所以話，體育精神就係咁體現出黎，日本隊真係雖敗猶榮！