【世紀之戰】McGregor提出改變規則，Mayweather接受！

文：MenClub Mr.波特　　圖：互聯網
POSTED ON 03 Aug 2017


相信唔少人都知道，黎緊8月26日喺美國拉斯維加斯將會上演一場「世紀之戰」，由生涯49場不敗嘅Mayweather大戰UFC雙料冠軍McGregor，呢場大戰喺體育界非常矚目，外界預計賽事將產生超過5億美元嘅價值，甚至可能超過美國著名賽事NFL超級盃。

本來，唔少人都睇好更年輕嘅McGregor(28歲)可以打倒Mayweather(40歲)，但後來當大會宣佈賽事將會以拳擊賽例黎進行後，由於McGregor本身只係打開UFC，佢擅長嘅踢技同埋鎖技都唔可以用，所以外界都一面倒認為Mayweather可以贏到呢場比賽，甚至好似前拳王泰臣就認為Mayweather可以打死McGregor。

而喺呢場以拳擊比賽作為基本規例嘅賽事入面，雙方配戴嘅為10盎司拳套。不過，McGregor後來喺4場記者會入面公開批評Mayweather以個人權力控制比賽，迫佢必需接受10盎司拳套呢項規則。由於作為UFC選手嘅McGregor一直帶開嘅係較輕嘅拳套，所以對於佢黎講帶上10盎司拳套係相當不利的。

對於以上嘅評擊，Mayweather作出左官方回應，佢表示唔好相信任何唔係黎自佢嘅消息(意思即係話佢無利用佢嘅權力去控制比賽規則)，佢已經同McGregor表示：「我地就用8盎司拳套比賽吧！」佢覺得只要McGregor覺得舒適，即使令佢有優勢佢都願意接受，佢希望可以令拳擊同MMA嘅支持者都睇到佢地想睇嘅野。

拳套由10盎司變成8盎司，代表拳套嘅保護性將會減低，而由於拳套重量減少，拳手嘅出拳速度將會增加，威力因此亦都會大增，所以每一拳打在對方身上傷害都會大幅增加。對於打開UFC嘅McGregor黎講，佢比賽不嬲帶開嘅都係一啲盎司較細嘅拳套，所以今次Mayweather接受減重對佢黎講絕對係好處。不過，其實同一時間亦代表Mayweather嘅出拳力量將會增加，McGregor必需小心提防。