【復仇成功】勇士主場擊敗騎士三年兩奪冠，KD首奪總決賽MVP

文：MenClub Mr.波特　　圖：互聯網
POSTED ON 13 Jun 2017


今日NBA總決賽黎到第5戰，雙方再次回到勇士主場甲骨文球館比賽，而領先總局數3：1嘅勇士雖然上場被騎士破左季後賽不敗金身，但呢支聯盟一哥繼績被看高一線，甚至有唔少人都認為上仗勇士落敗，只係因為想番主場先捧起冠軍獎盃。無論點都好，總之勇士喺主場球迷支持下，表現必定會反彈。

雖然上仗成功追番一場，但係騎士今仗依然係背水一戰，所以佢地一開場已經傾盡全力，令主場嘅勇士亦未能夠取得任何優勢，首節大部份時間騎士都可以領先4-5分左右，佢地個勢令唔少人都覺得騎士唔通真係可以再追多一場？

可惜嘅係，騎士喺第二節中段命中率開始下跌，令勇士重新掌握主導權，相信大部份球迷都知道，當勇士掌握主導權，佢地一眾球員嘅攻力就會慢慢展現出黎，其中Kevin Durant更加係手感火熱，喺第二節獨取13分，令勇士一口氣反超前領先騎士最多17分。

當勇士能夠大幅領先對手嘅時候，呢支球隊真係好難被擊倒，特別係佢地擁有兩大MVP：KD及Curry，真係好難同時阻止佢地兩個。雖然騎士喺第三節奮力反撲，並將分差縮窄至只有4分，但係勇士亦無自亂陣腳，並一直保持住領先優勢。

最後一節，騎士曾一直咬住勇士唔放，但係勇士卻不斷以三分球好似直插騎士心臟一樣，令分差再次擴大至雙位數。去到比賽尾段，雖然LeBron James不斷喺內線以個人力量單打成功，但騎士就係一直無辦法收窄比分，戰至最後一刻騎士亦只能夠舉手投降，最終勇士以129：120取得今仗勝利，總局數則以4：1擊敗騎士，繼2015年後再次奪得NBA總冠軍。

全場下來，勇士表現最好嘅球員再次喺KD，佢全場上陣40分鐘，20投14中，三分球8投5中，罰球6罰全中，取得全隊最高嘅39分，外加7籃板5助攻1抄截。五場總決賽下來，KD場均達到35.2分，而每一場佢都取得30分或以上，係勇士隊內表現最好而又最穩定嘅球員。除左KD外，Stephen Curry今日亦拎到34分10助攻6籃板3抄截，其中罰球15罰12中，表現亦都相當出色。

騎士方面，LeBron James已經盡晒力，佢上陣左46分鐘，即係全場只係休息左2分鐘，佢30投19中，三分球5投2中，罰球4罰1中，取得全場最高嘅41分，外加13籃板8助攻2抄截1封阻，佢能夠做嘅都已經做晒，可惜都係無辦法助騎士回天。今次總決賽落敗後，LeBron喺佢嘅球員生涯8次殺入總決賽，戰績為3勝5負，奪冠率只有37.5%。雖然再一次失落總冠軍，但係當比賽結束時，LeBron亦有主動向KD祝賀，並與他擁抱，未知他對KD說了什麼呢？會不會是「未來是你的」呢？

賽後，勇士全員及現場所有球迷都大肆慶祝，當球員捧起總冠軍獎盃時全場歡呼聲不斷。今次喺勇士三年內第二次拎到NBA總冠軍，而總決賽MVP(FMVP)就由今年先加盟勇士嘅KD奪得，唔知再一次失去呢個大獎嘅Curry會唔會有啲失望呢？