早前由Tesla公布嘅第三季汽車交貨量達83500架，較華爾街分析師預期嘅80500架為高，相信Tesla距離能夠實現盈利不遠。而近日Tesla再有利好消息傳出，喺踏入第四季後新款電動車Model 3產量達到10萬架，生產速度係歷來最快嘅電動車。

據外媒體Electrek報道指，Tesla喺美國時間星期六正式產出第10萬架Model 3電動車，達成咗Model 3嘅里程碑。而繼第三季交貨量有好表現後，Tesla喺第四季亦取得唔錯嘅開局，截至美國時間上星期五Tesla已經生產咗1.15萬架電動車，當中包括7400架Model 3，但Model 3嘅每日產㬓喺600架左右，每週產量距離目標5000架仲有一定距離。

現時市場期望Tesla Model 3嘅產量盡可能提高，以滿足消費者對Model 3交付嘅需求，而有報道指部分消費者尚未交付電動車並非汽車未出廠，而係電動車已運抵所在城市但未到消費者手中。相信Tesla如果可以解決交付問題，Model 3有機會成為美國市場上最暢銷嘅車型之一。

來源：Electrek