新型肺炎大肆影響香港運作，而其中健身室絕對係首當其衝嘅地方，唔單止一班健身故練生計受損，而一班鍾意健身嘅朋友亦無左操練嘅地方。不過，亦因為呢個原因，街頭健身呢項相對小眾嘅運動成功彈起，今次我地就訪問左街頭健身教練 - 姜庭峰。

街頭健身教練姜庭峰，同唔少人一樣，都係先入Gym room做Gym，佢自2013年開始操練，並於一年後機缘巧合下同朋友試玩「人旗」及「空中踏步」，之後發現呢類型動作非常有趣，所以被吸引去繼續研究及嘗試。當然，佢都唔係即刻就做到，從中不斷失敗再不斷嘗試，最後先可以成功。

對於普通Gym room及街頭健身，姜教練又點睇呢?

姜:街頭健身同普通健身最唔同嘅地方我覺得係，後者可能係1-2年先可以塑造到一個很好嘅身形，雖然前者都需要花好長時間，但街頭健身除左鍛鍊到身型之外，仲因為由唔識到完成某特別動作而有額外嘅成功感。

姜: 另外，普通健身只係不斷重覆同一動作及加大負重量，但街頭健身就有唔同嘅變化，以及需要搵出各個動作當中嘅技巧，後者視覺上嘅效果亦多了一份型格，呢一點係普通健身唔能夠比的。

說回姜教練嘅背景，佢喺2015年首次參加喺香港舉辦嘅街頭健身比賽，2017年已經於本地賽事中獲獎，其後更有機會參加街頭健身世界賽，並成為街頭健身教練。

不過對於健身初哥黎講，街頭健身好似難度好高，又係咪真係咁呢?

姜: 我會建議初學者先跟街頭健身教練或普通健身教練學一啲基本功以及先增加身體嘅肌耐力，之後先慢慢模仿一啲街頭健身嘅動作去做。當然你睇到嘅「人旗」等動作難度係非常高的，所以需要慢慢學習，掌握當中技巧，你亦都可以成功的。

姜: 而對於從未接觸健身既朋友，首次接觸街頭健身當然有一定難度，相對已經有健身經驗嘅朋友，從未健身嘅朋友對於發力及肌耐力可能會差一點，但靈活性則相對較高，因此可能更容易掌握某些動作。

疫情令健身室長時間關閉，街頭健身有無因此而得益呢?

姜: 本來疫情前已有唔少學生表示想學街頭健身，而疫情期間就更加加速佢地學習呢項運動嘅決心。而因為健身室長時間關閉，亦令更多人到街頭或公園進行鍛鍊，e.g.引體上升。

Special Thanks: Red Bull