日前美國對委內瑞拉採取軍事行動，拘捕長期執政、親中親俄親伊嘅總統馬杜羅，引起大眾關注國際形勢變化。邊個會成為呢場大國博弈嘅最大贏家暫時可能係未知之數，但有個不知名人士就真係靠住今次事件一夜發達：事關佢緊急落重注，買中馬杜羅會於1月31日前下台，因而激賺近40萬美金（約HK$311萬）！

大家都知外國幾乎咩都可以賭，而「預測投注網站」Polymarket早前就開出一系列關於委內瑞拉及馬杜羅嘅盤口。到1月3日美國政府宣佈捕獲馬杜羅夫婦之後，Polymarket玩家兼Podcast主播Joe Pompliano就發現，有個不知名帳戶自12月31日開戶之後，連續四日投注「馬杜羅將於2026年1月31日下台」。而且於1月2日，即係距離美方軍事行動不足24個鐘時，該帳戶更四次加注共26,215美金（約HK$20.3萬），總投資額達32,537美金（約HK$25.3萬）。最終「派彩」金額達43.6萬美金（約HK$340萬），勁賺超過40萬美金，回報率高達1242%。

除止之外，該帳戶亦有小額投注「美國軍隊於2026年1月31日前進入委內瑞拉」、「特朗普會於2026年1月31日前對委內瑞拉展開軍事行動」等三個項目。最終用1,400美金 (約HK$1.1萬）賺7,054美金 (約HK$5.5萬）。

圖片：Polymarket

由於該不知名帳戶不論開戶時間，以至投注項目都非常有針對性，所以唔少人都估計該用戶乃係美軍方面嘅知情人士，甚至就係來自五角大廈內部，引起「內幕交易」嘅批評。不過據Joe Pompliano指出，類似嘅投注於「預測投注網站」其實非常常見，事關此類網站認為自己嘅價值在於「[提供比所有人更快、更準確嘅消息」，而有人按內部消息行事就符合呢個立場。Polymarket CEO更曾經直指「內幕交易」係應該被鼓勵嘅。

資料來源：The Verge