過去多國大力推行STEM（科學、技術、工程、數學英文首字母縮寫，以下簡稱理工科）教育，加上近年AI技術大爆發，帶動半導體、電腦科學等熱潮，大家或者會以為未來讀理工科一定比文科更吃香，至少唔怕搵唔到工。不過近日美國紐約儲備銀行就公佈咗美國大學生就業數據，令人驚訝嘅係理工科畢業生嘅失業率不僅高於平均，甚至比起以往普遍認為「讀完都唔知可以做咩」嘅文史哲科目更高！

據外媒《Entrepreneur》報導，美國紐約儲備銀行日前公佈關於年齡屆乎22至27歲嘅近期大學畢業生就業數據，當中顯示近期畢業生嘅失業率於今年2月為5.5%，比起整體大學畢業生失業率2.6%高出近一倍。而單論就業率而言，部份科目嘅畢業生可謂非常吃香，例如營養科學、建築服務以及動植物科學三科嘅畢業生，失業率僅為1%或以下，換言之絕大部份人讀完就即刻搵到工。

你可能會話，上面三科咪又係理王科？雖然無錯，但同一個研究亦發現美術史以及哲學呢兩門過去著名嘅「乞食科」，其近期畢業生嘅失業其實都只分別3%及3.2%，比大學畢業生平均低之餘，亦比美國整體失業率低。

更驚人嘅發現係，讀電腦科學、電腦工程、化學、物理等傳統理工科嘅近期畢業生失業率，竟然全部都超過6%，當中理應於AI浪潮中獲利嘅學科，失業率更分別達到6.1%及7.5%。

往正面睇，理工科畢業生一旦搵到工，其收入的確會拋離文科生。例如研究就指出電腦科學及電腦工程畢業生嘅平均年收入為8萬美金（約HK$62.5萬），比起藝術史（年收4.5萬美金，約HK$35萬）、哲學（年收4.8萬美金，約HK$37.5萬），以至上述提到嘅「搵工神科」營養科學（年收7.5萬美金，約HK$58.5萬）都要高。但其實美國平均個人收入亦只係4.22萬美金左右（約HK$33萬），換言之即使係文史哲畢業生嘅收入都已經係平均之上。

事實上就業市場對理科生，特別係電腦程式相關專材嘅需求或者比想像中要低。例如Microsoft CEO Satya Nadalla及Google CEO Sundar Pichai近來都分別講過，公司內部有20-30%嘅程式已經用緊AI編寫，未來AI嘅佔比相信只會更多。

另一邊廂，又有啲傳統上同文史哲冇咩關係嘅大企業開始追求相關人才。例如專注於金融及科技嘅投資公司Blackrock，其COO Robert Goldstein去年就講過需要更多歷史或英語系人材，以提供不同嘅視覺、解決問題嘅方法。另一投資公司Goldman Sachs'嘅CIO Marco Argenti亦於去年指出，當AI可取代部份工作時，單純嘅工程學位已經唔夠用，可能要搭多個哲學學位先更有競爭力。

資料來源：Entrepreneur