過去十多年，Apple一直都固定喺每年秋季（9月或10月），一口氣推出全新一代iPhone系列，不過呢個行之已久嘅傳統，可能會由今年起出現轉變。近來愈來愈多消息指出，Apple正計劃調整發布策略，未來未必會同時推出所有型號，而係先喺秋季推出Pro等高階機型，至於較入門及標準版機型，則延後到下一年先登場。大家又點睇呢個新策略呢？

外界盛傳Apple今年會推出首款摺機iPhone Fold（概念圖）

據外媒《MacRumors》報導，如果新策略成真，預計iPhone 18 Pro、iPhone 18 Pro Max以及傳聞中嘅首款摺疊iPhone等高階型號，將於今年秋季率先推出，而標準版iPhone 18則會延遲到2027年春季推出。

報導指出，呢個改動主要同iPhone產品線愈來愈龐大有關。隨住iPhone 16e同 iPhone Air於2025年相繼登場，加上首款摺疊iPhone有望今年問世，而iPhone 16、iPhone 16 Plus等舊型號又繼續賣緊街，到咗今年年底，Apple可能會同時賣緊8款唔同嘅iPhone。如果改用分段發布策略，可以令各款機型定位更清晰，延長各自銷售周期，亦有助減少同門之間嘅競爭，仲可以令全年都有新機話題。

另外，供應鏈分析師亦認為，生產同物流層面嘅考慮，亦可能係Apple轉變策略嘅原因之一。透過拉開唔同型號嘅發布時間，可以減輕生產高峰期嘅壓力，更靈活咁管理先進零件嘅供應，同時亦有助將收入分佈喺唔同財政季度，而唔係集中喺單一時段爆發。