萬眾期待嘅《Stranger Things》第五季大結局已於12月31日上線，而Netflix亦安排大結局於12月31日至1月1日期間於院線進行特別放映。而據報呢短短兩日嘅放映期，就為院線帶來2500萬至3000萬美金「票房」（約HK$1.94億至2.33億）。搞到美國最大院線AMC嘅CEO都要發文呼籲Netflix安排更多電影於院線放映。

據《Deadline》報導，《Stranger Things》大結局於美國超過620個戲院上映，並賣出超過110萬個座位，大幅拋離之前《Kpop 獵魔女團》嘅70萬人次紀錄。而且《Stranger Things》於短短兩日就帶來2500萬至3000萬美金「票房」，比起《Kpop 獵魔女團》嘅1900萬美金要高，令其成為今年「票房」最高嘅Netflix電影。更值得一提嘅係，《Avatar: Fire and Ash》嘅同期票房都係2300萬美金左右，可見《Stranger Things》以至Netflix嘅吸引力。

點解我要括住「票房」兩個字呢？就係因為《Stranger Things》嘅收入嚴格上唔係「賣飛」而來。據報Netflix為咗避開與《Stranger Things》演員們嘅分紅協議，所以唔可以直接「賣飛」，而係以「買20美金飲食送入場資格」嘅方式發售。亦因如此，上述嗰2500萬至3000萬美金「票房」係全數落入院線及Netflix褲袋，絕對稱得上係大賺一筆。

而業界亦估計《Stranger Things》嘅好成績，會否動搖Netflix一貫串流至上嘅發行方法。事實上Netflix於相關議題嘅立場近來一直反覆改變。8月《Kpop 獵魔女團》上映後，Netflix CEO Ted Sarandos曾於財政報告中表明Netflix仍會優先將電影放於串流服務之中；但到宣佈收購Warner Bros.之後，佢又話「我哋100%致力於按業界標準檔期，於院線放映Warner Bros.電影」。

而Netflix口中呢個「業期標準檔期」亦值得斟酌。事關據《Deadline》報導，Netflix未來打算將Warner Bros.嘅院線上映期定為17日，僅為院線業者主張嘅45日三份一左右。院線業者或者要期望《Stranger Things》院線版嘅好成績，能夠吸引Netflix放寬未來Warner Bros.電影嘅上映檔期，甚至推更多Netflix自家製作去院線啦。

資料來源：Deadline