無論係為咗迎合部份顧客嘅喜好、改善企業形象、又或者真係想為保護生態環境出一分力，反正近來的確越黎越多企業推出重視環保、減低碳排放嘅產品。長遠黎講，呢啲行為或者能夠有助改善大家嘅生活，但短期內就可能會令某啲人嘅生活更加艱難。Principal Global Investors首席全球策略師Seema Shah撰文指出，綠色經濟 (Greenfication) 可能會造成通漲。

據Seema Shah指，不少國家對企業嘅碳排放都有限額，如果企業排放超出限額，就需要於市場上向有餘額嘅其他企業收購「排碳權」，換言之即係用錢解決問題。但當越黎越多企業都爭奪限額時，「排碳權」嘅價錢就會上升，從而增加企業成本；如果唔買夠「排碳權」，又會被政府罰錢，同樣增加成本。即使企業有意轉用更環保嘅生產或經營手法以減低碳排放，前期都必須投資更多人力、物力，同樣造成成本上升。

而企業一係就自己食咗個成本，變相賺少咗或者直接要蝕錢；又或者將成本轉嫁畀顧客，就即係加價。當好多企業都做緊同一樣嘢時，整體物價水平就會上升，成為通漲。值得一提嘅係，Nordea Asset Management資深總經策略師Sebastien Galy指呢種通漲並非暫時性，而係有可能維持超過十年。縱然環保的確係所有人都必須考慮嘅問題，但呢個「環保嘅代價」又係咪每個人都願意付、付得起？