唔知大家有冇聽過，大約20年前Microsoft曾經打算收購任天堂，結果被對方一笑置之。適逢Microsoft Xbox問世20周年，日前官方就推出線上虛擬博物館展出Xbox主機發展歷程，其中就包括當年嗰封收購信，幽自己一默。

Microsoft日前推出嘅網頁版Xbox虛擬博物館，帶領玩家進入一個虛擬世界瀏覽Xbox發展歷史、主機設計原型、過往遊戲數據，甚至連「三紅燈警告」呢類經典故障都有份。但講到最有趣嘅展品，就係Microsoft當年提出收購任天堂嗰封電郵，信中提到2000年時任Microsoft副總Rick Thompson去信到北美任天堂，承諾公司會將Dolphin（當年任天堂主機Gamecube嘅開發代號）締造成最好嘅遊戲主機，結果當然唔成功，否則大家都唔會見到今時今日Switch、Xbox及PlayStation三分天下嘅局面。

據外媒Bloomberg年初報導，當年Microsoft希望透過自家硬件優勢，再結合任天堂遊戲開發能力，打低競爭對手Sony嘅PlayStation，所以向任天堂提出收購，結果令對方笑到屁股尿流（原句：laughed their asses off），而前Xbox高層Kevin Bachus仲話當年開會，感覺就好似被對方笑足全程。如果當年Microsoft真係成功收購咗任天堂，唔知遊戲界會變成點呢？