一度帶領利物浦無限接近英超冠軍嘅羅渣士喺2015年慘食無情雞後，就轉戰蘇超執教當地班霸些路迪。唔好睇佢當年敗走利物浦，佢去到些路迪可以話係順風順水，執教兩季都嬴到蘇超冠軍。雖然話些路迪喺蘇超就好似拜仁慕尼黑喺德甲咁，拎到冠軍係應份，不過羅渣士執教下今季成績真係好優秀，聯賽踢咗30場戰績係28勝2和，未輸過之餘仲提早8輪拎到冠軍，好似篇潮文話齋，羅渣士真係唔係一條濕X嚟。

羅渣士今季最偉大成就，就係打破咗50年前些路迪嘅本地賽事不敗紀錄。50年前些路迪喺時任領隊Jock Stein帶領下創出本地賽事26場不敗成績，而今季些路迪已經去到37場不敗，壓倒性嘅表現絕對唔係贏冠軍咁簡單。不過如果講獎盃呢，都仲係1966-1967球季巴閉。因為Jock Stein當時帶領球隊成為五冠王（蘇格蘭聯賽、蘇格蘭盃、聯賽盃、歐洲冠軍杯、以及1988年停辦嘅格拉斯哥盃），反觀現時嘅些路迪喺歐聯成績就麻麻地，小組賽只係贏過一場，雖然3-3迫和曼城都係代表作，但最後仍然未能晉身歐聯十六強賽事。

Skysports就曾經訪問呢位北愛爾蘭領隊，問佢些路迪有無能力挑戰英超。羅渣士二話不說就話些路迪絕對有能力挑戰英超，因為佢哋每星期都有60000名球迷支持，仲話如果唔講財力，些路迪要留喺英超前六係唔成問題。些路迪打英超梗係假設性問題，但係羅渣士回歸英超又或者真係會成事。前蘇格蘭國腳查理尼高拉斯就覺得羅渣士可以接替盛傳離隊嘅雲加執教阿仙奴，羅渣士話晒係史雲斯地面進攻戰術嘅始祖，阿仙奴其實幾啱佢教。

就算羅渣士重返英超無望，下季大家或者都會見到啲來自些路迪嘅新面孔，講緊就係佢哋陣中嘅射手梅沙丹比利。呢位20歲嘅法國前鋒係富咸青訓出身，上季夏天就已經有傳熱刺想收購佢，不過最後就無成事，唔係一隊波有兩個丹比利真係玩死講波佬。最後佢就轉會去些路迪，而且表現仲非常可人，所有比賽上陣46場入咗32球，又引黎唔少英超球會派球探觀察呢位小將表現。不過羅渣士就好有信心梅沙丹比利下季仍然係些路迪球員，唔啱一齊轉戰英超咪唔使煩囉！