圖片：The Guardian

上星期歐聯八強首回合馬體會作客巴塞隆拿費蘭度托利斯可以話神又係佢鬼又係佢，佢為球隊先開紀錄之餘又魯莽領紅，今晚次回合佢要留喺觀眾席做啦啦隊。其實費托星期六作客愛斯賓奴嘅西甲賽事又交出一入球一助攻，好似又準備又一次復活咁喎。大家都知馬體會由AC 米蘭借用費托嘅合約今季就會完結，本來施蒙尼就唔打算長簽費托不過西班牙傳媒就話馬體會會再考慮長簽費托嘅可能性。

圖片：Mirror

今季費托所有賽事中正選加後備上陣總共24次，同時為馬體會提供咗7個入球同3個助攻。睇落數字唔算可觀，但已經係基沙文之後馬體會嘅第二射手，即使以一個唔係必然正選嘅球員嚟講，數字都算不過不失，同以前喺車路士嘅時間比都算幾大進步添。

圖片：Fourfourtwo

我諗都無乜人會反對費托喺返馬體會終老嘅，佢同馬體會嘅緊密關係難以用文字形容，即使高峰已過可能力有不逮，不過費托都係盡自己能力為球隊貢獻所有，而且數字上費托都真係有貢獻，好多時佢喺大賽都有驚喜表現。忠心勤力又有實力，施蒙尼不如就俾個機會費托啦。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。