時隔七年，Pixar皇牌動畫系列《Toy Story（反斗奇兵）》新作終於公開首部預告！胡迪同巴斯光年將再度回歸，但今次佢哋面對嘅敵人唔係啲咩邪惡玩具或者玩具破壞王，而係現今無數小朋友都會沉迷嘅「電子奶嘴」，一部智能平板電腦。

《Toy Story 5》由《WALL-E（威E）》及《Finding Nemo（海底奇兵）》大導Andrew Stanton親自操刀，旨在探討傳統玩具喺數碼時代點樣面對被淘汰嘅危機。從預告可見，故事將承接上一集結局，胡迪同牧羊女Bo Peep一齊浪跡天涯過住無拘無束嘅生活，但留守喺Bonnie身邊嘅一班舊戰友卻面臨史無前例嘅重大危機！事關現時已經8歲嘅Bonnie迷上咗一部名為「Lilypad」嘅青蛙造型平板電腦，日日沉迷篤螢幕，搞到一班傳統玩具慘被打入冷宮，隨時面臨被送入捐贈箱棄置嘅命運。

眼見情況危急，暫代老大位置嘅Jessie唯有用對講機向胡迪求救：「科技入侵咗我哋屋企，我哋快要因為呢部裝置而失去Bonnie啦！」而最令人爆笑又心酸嘅一幕，就係強勢回歸嘅胡迪經過歲月洗禮後，變成一個有「地中海」禿頭兼著住冷衫斗篷（poncho）嘅玩具，隨即被Lilypad取笑：「你係乜水呀？阿伯玩具？」

今集除咗有一班原班人馬回歸，包括Tom Hanks繼續聲演胡迪、Tim Allen聲演巴斯光年、Joan Cusack聲演Jessie之外，仲加入咗幾位新角色，其中最大反派平板電腦「Lilypad」由《Past Lives》女星Greta Lee配音，而美國名嘴Conan O'Brien亦會聲演一個教小朋友去廁所嘅高科技玩具「Smarty Pants」。電影預計在2026年6月19日於美國正式上映，唔知今次一班玩具又會點樣守護小朋友嘅童真呢？