Sony PlayStation近年似乎銳意要加入日漸成熟（甚至可能有啲飽和）嘅手提遊戲機市場。繼去年9月傳出下一世代嘅PS 6可能會有如Switch一樣嘅手提版，近日又有傳Sony將於2027年推出屬於本世代嘅手提版主機，而且唔係之前PlayStation Portal嗰種要靠Wifi連自己主機或者雲端嘅取巧方法，而係能夠原生運行所有PS5嘅高性能主機！

圖片：ImagaFX

據巴西媒體《Mix Vale》引述知情人士指，Sony已經指示旗下各個遊戲工作室調整開發流程，確保所有PS5大作都可以於新手提機上無縫運行。報導亦指Sony已經更新咗軟件開發套件(SDK)，要求開發者優化遊戲時考慮到手提機嘅供電同散熱需求，但同時又要保持遊戲嘅流暢度。可見Sony視新機為Nintendo Switch及Steam Deck嘅同級產品。

據報新機會用上AMD最新嘅客製化晶片，採用Zen 6架構同3納米製程。處理器方面會有8個核心，其中4個係高效能核心負責遊戲運算，另外兩個係低功耗核心處理系統任務。而圖像方面則會由有16個運算單元、頻率達1.6至2.0GHz嘅RDNA 5架構GPU負責，支援光追之外，仲有PSSR（PlayStation Spectral Super Resolution）幫手提升圖像解像度，以進一步改善畫面質素。再配上24GB LPDDR5X記憶體，單睇配置就已經比得上入門級電競電腦。

圖片：Sony

有業界分析師估計，呢部手提機售價會落於400至500美元之間(約HK$3100至3900)。肯定就唔算平，但考慮到規格，以及可以直接玩成個PS5遊戲庫，等於有部拎得出街嘅PS5，對於死忠PS粉絲嚟講絕對有吸引力。

資料來源：MixVale 1、2