迪士尼樂園係唔少人去外國旅行嘅必去景點，亦可能係全個Trip使得最多錢嘅一日。不過未來大家就可能花更多錢先可以入到迪士尼樂園。事關迪士尼首席財務官 Hugh Johnston近日表示，公司計劃將「動態票價」（Dynamic Pricing）引入美國本土主題樂園，換言之未來去迪士尼都好可能要搶平飛。

所謂「動態票價」，即係門票價格會按即時需求、市況等因素浮動，類似機票定價模式。Hugh Johnston雖然笑言「唔太想用機票嚟做比喻」，但亦承認原理類近，亦坦言迪士尼酒店早就一向用類似做法，今次只不過係將概念延伸去樂園入場門票。不過佢強調，公司會小心處理，避免引起遊客體驗問題或太大負面反彈，目前喺巴黎暫時未見明顯投訴。

之於未見投訴嘅原因，Hugh Johnston都講到明係因會去迪士尼嘅人收入都比較高，所以對價格其實唔太敏感。事實上迪士尼樂園近年都調整過園內飲食、商品、Fast Pass、VIP導覽等價錢，務求儘量提高入園人士人均消費。而從財政報告黎睇佢哋呢個策略相當成功：去年入場人次則輕微下跌 1%，但Experiences 部門營業收入按年上升 8% 至 100 億美元——用以前中學經濟學嘅概念黎睇，就係去迪士尼班人嘅價格彈性非常低。

資料來源：Deadline