Sony 將於明日（11月21日）於日本推出一款「日本限定」平價無光碟版PS5。該款式型號為CFI-2200B01，並只提供日文介面，內置容量亦縮減至896GB，但定價就僅為55,000Yen（約HK$2,715)，遠低於現行正常無光碟版嘅72,980 Yen (約HK$3,600)。而近日有日本節目分析認為，呢部「日本專用廉價機」其實係 Sony 針對本土市場頹勢嘅反應，同時亦試圖解決多年黎日版PS5被中國玩家搶購嘅問題。

日前東京電視台於節目中分析Sony推出「日本專用廉價機」嘅原因。其中一個可能就係試圖挽救被Nintendo Switch侵佔嘅日本本土市場。節目指Switch可手提、可家用嘅設計，加上任天堂嘅遊戲IP，令其深受日本玩家特別係年輕人嘅歡迎。當Switch 2推出之後，更加大幅收窄與PS5嘅性能差別，換言之PS5嘅生存空間不停被壓縮。

從銷售數字亦可以睇到PS5所處嘅困境。任天堂早前公佈自Switch 2於6月推出後，日本本銷量就已經超過260萬台；反觀PS5推出五年、計哂所有版本嘅日本本土總銷量僅為700萬台多啲。亦即係話Switch 2本土銷量有可能於半年後超過PS5。另一邊廂，Switch 2發售時亦有推出售價更低嘅日本專用版本，理應都係為咗保障日本本土市場嘅佔有率。所以今次Sony推平價PS5亦好可能係試圖跟風。

圖片：Sony

圖片：テレ東BIZ

日本人唔玩PS5嘅另一個原因，就係大量日本PS5主機都被中國水貨客轉售至中國。由於日圓近年持續低水，而中國版嘅PS5有鎖區，所以中國玩家更偏向購買無鎖區嘅日版PS5。不過新推出嘅平價版就只有日文語言，而且必須連上日本區PSN帳號遊玩，變相加大轉售至中國嘅難度。

但值得一提嘅係，呢部平價版其實都唔係特別「平」。PS5無光碟版於2020年推出時售價僅為43,980 Yen（約HK$2,170），但往後幾年Sony不停加價，去年9月更加到依家嘅72,980 Yen，加上近年遊戲大作都係多平台發售，於是驅使唔少主機玩家轉投Xbox甚或PC嘅懷抱。呢部日本限定平價機最終能否真係幫到 Sony 喺主場挽回劣勢，暫時都仲係問號。

資料來源：IGN、テレ東BIZ