迪士尼科幻新作《Tron：Ares（創戰紀：戰神降臨）》上周於全球各地陸續上映，雖然喺北美成為上周末票房冠軍，但實際數字卻未如理想。在北美開畫首三日僅收3,350萬美元，唔單只輸畀前作《Tron: Legacy（創戰紀）》，甚至仲差過同樣由Jared Leto主演嘅《Morbius（魔比煞）》。

根據票房網站Box Office Mojo統計，《Tron：Ares》上周五在北美4,000多間戲院正式上映，首周末三日票房僅收3,350萬美元，而海外市場亦同樣慘淡，只收得2,700萬美元，合共全球開畫票房為6,050萬美元，遠低於業界預期嘅4,000至4,500萬美元（北美）同8,000至9,000萬美元（全球）。呢個開畫成績唔單只差過2010年上映嘅前作《Tron: Legacy》，甚至仲差過同樣由Jared Leto主演、2022年上映嘅超級英雄電影《Morbius》，前者為4,400萬美元，而後者就算界人鬧爆都有3,900萬美元，仲要未計通脹調整。

據了解，《Tron：Ares》製作成本高達2億美元，除非未來幾周有顯著反彈，例如套戲將於今個星期五喺龐大嘅中國市場上映，否則迪士尼都好大機會要蝕本。值得一提嘅係，迪士尼本來係希望靠呢部戲重振《Tron》呢個經典IP，並帶動一波續集熱潮，但而家睇嚟好似有啲渺茫。