Apple喺2023年推出嘅Vision Pro，憑藉強勁效能同沉浸式體驗令人印象深刻，但由於價格高昂、機身重同應用程式唔夠多，始終未能打入大眾市場。對此，Apple原本計劃開發一款更輕巧同平價嘅頭戴式裝置「Vision Air」，但據《Bloomberg》記者Mark Gurman最新消息，目前Apple已經停止開發Vision Air，並將資源轉向開發更具潛力嘅智能眼鏡，準備同Meta嘅Ray-Ban系列正面交鋒。

《Bloomberg》記者Mark Gurman喺最新一期「Power On」專欄提到，雖然Apple財力雄厚，擁有數以萬計嘅工程師同頂尖嘅製造能力，但基於公司嘅核心理念「唔會喺冇潛力成為主流產品嘅項目上大灑金錢」，所以佢哋唔會好似Meta咁同時開發智能眼鏡及頭戴式裝置兩條路線，而係選擇停止開發Vision Air，集中火力轉攻智能眼鏡。呢個決定亦反映出Apple認為Vision Pro呢類頭戴式裝置在短期內難以成為市場主流，事關Apple向來唔鍾意追逐小眾市場，佢哋最成功嘅產品，例如iPhone、iPad、Apple Watch、Mac同AirPods，全都都係銷量過千萬甚至破億嘅大熱產品。

話雖如此，但Mark Gurman唔認為Vision Pro嘅產品線會就此完結，而係會演變成一個包含低階到高階產品嘅「Vision」系列。Vision Pro將會成為當中嘅頂級旗艦產品，而系列仲可能包括有螢幕嘅智能眼鏡同無螢幕嘅入門級智能眼鏡。呢種產品線擴展策略正正係Apple嘅強項，睇下iPhone、iPad、Apple Watch同AirPods嘅產品分級就知。此外，Mark Gurman仲估計Apple嘅智能眼鏡好大機會會用上Vision Pro嘅操作系統visionOS，所以之前喺呢個系統上嘅開發工作唔會白費。

順帶一提，Apple嘅競爭對手Samsung似乎都向住同樣方向發展。雖然Samsung計劃喺今個月推出一款高階混合實境（XR）頭戴式裝置同Vision Pro競爭，但佢哋同時亦同緊Google合作，開發有螢幕同冇螢幕嘅智能眼鏡。睇嚟智能眼鏡將會成為科技產品界下一個大戰場！