由芥見下下創作嘅人氣漫畫《咒術迴戰》宣布推出外傳短篇《咒術迴戰≡》，並於今日起於「週刊少年JUMP」正式展開連載！預計會連載六個月，推出大約三本單行本。

『呪術廻戦≡』（じゅじゅつかいせんモジュロ）
（原作：芥見下々／作画：岩崎優次）

週刊少年ジャンプ41号から連載開始#呪術廻戦 #JujutsuKaisen #呪術モジュロ pic.twitter.com/Xcv5OMBvxm

— 呪術廻戦【公式】 (@jujutsu_PR) September 7, 2025

據官方介紹，《咒術迴戰≡》由芥見下下擔任原作，曾負責《暗號學園的伊呂波》嘅漫畫家岩崎優次擔任作畫。故事設定在「死滅迴游」68年後嘅2086年，某日一艘太空船突然降臨到地球，並帶來一班自稱為「西姆利亞星人」嘅外星種族。與此同時，乙骨憂太與禪院真希嘅後代「乙骨真劍」與「乙骨憂花」，將肩負起保護地球存亡嘅重任。

芥見下下透露，其實在本篇連載期間，曾經有人向佢提議由其他人執筆外傳，但佢當時因為擔心無法控制作品走向而拒絕。不過，呢個提議啟發咗佢，令佢開始思考點樣可以進一步擴展《咒術迴戰》嘅世界觀，例如擴充本篇某部份、深入討論某些設定、改變時代背景，甚至試下平行時空。結果，最天馬行空嘅《≡》竟然成功通過連載會議！另外，佢仲提到呢部外傳係短期集中連載，如果冇被腰斬預計會連載半年，總共推出三本單行本。與此同時，佢亦大讚岩崎優次畫功超強，希望觀眾可以透過《≡》作為《咒術迴戰》嘅全新入口，並享受其中。