由匈牙利導演Ildiko Enyedi執導，梁朝偉、Luna Wedler、Enzo Brumm及Léa Seydoux主演嘅《Silent Friend》日前在威尼斯影展壓軸登埸，並獲得全場長達5分22秒掌聲！而官方亦同步公開電影首部預告，讓影迷先睹為快。

《Silent Friend》故事主要分為三個單元，圍繞德國馬爾堡大學植物園一棵百年銀杏樹展開，講述呢棟老樹如何作為「沉默的朋友」見證了1908年、1972年及2020年三個唔同時代主角嘅人生變遷。而梁朝偉將於第三個故事擔正，飾演一位嚟自香港嘅神經科學家，因疫情而滯留在德國校園，並對老樹進行實驗，研究植物能否與人溝通，期間仲透過視像通話向植物溝通專家（Léa Seydoux 飾）請教。而另外兩個單元分別講述1972年，一個年輕學生（Enzo Brumm飾）因觀察一株天竺葵並同佢建立連繫，人生從此改變；1908年，該校首位女學生（Luna Wedler飾）透過攝影，喺植物中發現宇宙嘅神聖圖案。三個角色都因大自然而得到啟發同蛻變。

從預告可見，梁朝偉戴上眼鏡化身為學者，並將儀器接駁到樹上，以全英語表示：「我想做嘅測試並唔複雜。如果植物會以我哋觀察佢嘅方式，嚟觀察我哋嘅話，究竟會點樣呢？」另外，1908年嘅故事似乎會以黑白畫面呈現，增添時代感。