Netflix人氣劇集《今際之國的有栖》第3季，今日一口氣公開前導預告、劇情大綱及演員陣容，除咗山崎賢人、土屋太鳳、三吉彩花等原班人馬回歸，今次仲加入咗唔少新面孔，預計今年9月25日正式播出。

據官方介紹，《今際之國的有栖》第3季將延續上季劇情，講述有栖一行人成功通關所有遊戲回到現實世界，但大家都失晒憶唔記得「今際之國」發生嘅事。有栖同宇佐木喺醫院再次邂逅，並結為夫妻，過住幸福快樂嘅生活。不過，兩人周不時都會夢到今際之國嘅畫面。直到某日，宇佐木被一位名為隆二（賀來賢人 飾）嘅「來世研究者」帶領下突然人間蒸發，與此同時，盤田（磯村勇斗 飾）出現喺有栖面前，表示宇佐木已經回到今際之國，並將最後一張「JOKER」卡牌交畀有栖。為咗拯救宇佐木，有栖決定重返今際之國再次挑戰兇險嘅死亡遊戲。究竟今次佢哋可唔可以順利返到現實世界？

除咗山崎賢人、土屋太鳳、三吉彩花、磯村勇斗、每熊克哉等人會回歸，今次更加入大倉孝二、須藤理彩、池内博之、玉城蒂娜、醍醐虎汰朗、玄理、吉柳咲良、三河悠冴、岩永丞威、池田朱那、賀来賢人等多位新面孔。