由Sydney Sweeney及Glen Powell主演嘅愛情喜劇《Anyone but You（真的狠愛你）》，在2023年聖誕檔期上映後大受歡迎，最終全球斬獲2.2億美元票房。其中一大賣點當然係兩人之間火花四射嘅化學反應，甚至一度被外界認為係「戲假情真」。雖然事後佢哋承認親密互動只係宣傳技倆，但確實傷害咗身邊嘅另一半。

Glen Powell前女友Gigi Paris日前在Podcast節目《Too Much》首度開腔，公開談論佢同Glen Powell喺2023年4月分手嘅內幕。當時Glen Powell與Sydney Sweeney拍攝《Anyone But You》期間不斷傳出緋聞，但Glen Powell唔單止冇澄清，反而順勢炒作緋聞提升電影熱度，令到Gigi Paris非常失望：「我只係想得到尊重，尤其係當緋聞已經傳到街知巷聞。唔好令到我好似一個傻仔咁出醜。我吔一齊超過3年，甚至講過要白頭偕老，至少應該畀返尊重吧？但佢決定將工作放喺首位。咁好呀，隨便你，呢個係你嘅選擇，我唯有離開。當你需要企出嚟講句：『我絕對唔會背叛我女友，我唔會咁做。』嗰陣，你喺邊度？一句簡單嘅澄清就夠，但佢一句都無講過...從來都無。最令我接受唔到係呢件事嘅處理方式，我覺得自己就好似被人拋棄去餵狗...仲要同我講：『我為咗工作必須咁做。』」

電影大賣後，Glen Powell曾在2024年4月向《The New York Times》承認，佢同Sydney Sweeney嘅緋聞全是宣傳技倆：「我同Sydney Sweeney合作得非常開心，我吔之間好有火花。觀眾希望銀幕上嘅愛情延伸到現實，有時你真係要順水推舟，而呢招確實好work！Sydney好聰明。」而同為監製之一嘅Sydney Sweeney亦提到：「我哋推廣電影時，想同觀眾保持互動，因為歸根究柢，係佢哋創造咗呢個故事。」

View this post on Instagram

A post shared by Gigi Paris (@msgigiparis)

Gigi Paris更在節目中提到，佢曾經想飛去澳洲探班，但被Glen Powell拒絕：「佢打電話嚟同我講：『我同監製商量過，覺得你最好唔好嚟片場。』我即刻收線，然後心諗呢個男人真係同我玩完！我原本都抱住一絲希望，覺得去到澳洲可能有轉機，但嗰刻我明白，嗰個我愛過嘅人已經唔存在了。」