經典恐怖電影系列《恐懼鬥室》在2023年推出第10集《恐懼鬥室X》，難得喺爛番茄獲得正面評價並斬獲1.12億美元。片商獅門影業見勢頭好，亦即刻宣布開拍續集。不過，最近有消息指由於製片人之間出現拗撬，電影已擱置製作近一年，最後甚至取消製作。

據外媒《Bloody Disgusting》報導，隨住《恐懼鬥室X》在評論界及票房取得成功後，片商獅門影業隨即敲定續集，並搵嚟第6、7、10集導演Kevin Greutert繼續執導，第4、5、6、7集編劇檔Patrick Melton與Marcus Dunstan回歸撰寫劇本。原定2024年9月27日上映，但後來推遲至2025年9月26日上映，並無解釋原因。

消息人士透露，《恐懼鬥室11》其實早於2024年1月已經擱置製作，原因係幕後兩位製片人發生爭執，一位希望推動部戲早日開拍，而另一位卻不斷阻攔，結果搞到製作完全停擺。最離奇嘅係，獅門影業並冇派人出面調解呢場紛爭，試圖將呢部吸力金十足嘅電影重回正軌，最終導致《恐懼鬥室11》遭到取消。

目前該作仲有多條伏線尚未收尾，隨著第11集遭到取消，成個系列或者就此GAME OVER。雖然消息人士表示，呢個系列或者會賣畀比其他公司接手，但就算成事，十居其九都會係「重新開始」（重啟），換言之現有角色同故事可唔會再出現。難怪文章作者都不禁感嘆：「殺死Jigsaw嘅並唔係癌症，而係人類嘅貪婪同自我膨脹。」