依家大家晚晚打《Monster Hunter Wilds》刷裝、黎緊五月又有《Elden Ring Nightreign》等緊，相信呢段時間有PS5或打機電腦嘅人晚晚都會好忙、冇機嘅亦可能諗緊買機或砌機。不過近日Sony就於英國及日本分別推出「租機」服務，令冇PS5嘅玩家都可以短期入坑，當中日本地區嘅租金更低到兩個禮拜唔使HK$100！

圖片：direct.playstation.com

據《Eurogamer》及《Automation》等媒體報導，Sony於今月初分別於英國及日本兩地推出PS5租借服務。其中於英國嘅服務由Sony官方直營，玩家可以租借PS5（有碟冇碟都可以）、PS5 Pro、PS VR2、PS Portal以至功能更多嘅Dual Sense Edge手掣等。當中收費採用類似訂閱制嘅「時間越長越平」模式，例如租借PS5 Pro單月要35.59英鎊（約HK$360），但如果租36個月嘅話每月平均就只需18.95英鎊（約HK$190）。

而日本方面Sony則與大型遊戲零售商「GEO」合作，只能租PS5（有碟版），但價錢就平到你唔信。租7日8夜只需980Yen，即係HK$50左右，租14日15夜都只係1,780Yen，港紙唔使$100。或者就係因為非常平嘅關係，加上近來《Monster Hunter Wilds》大受歡迎，所以目前所有主機都已借出。值得一提嘅係，租借頁面上仲有個未開放嘅「月額Rental」版面，相信係未來會推出類似英國地區嘅月租計劃。

圖片：geo-arekore.jp

當然，你心水清嘅話就會發現，如果喺英國租36個月（總價682英鎊），基本上就等如一部PS5 Pro嘅價錢（官方售價699.99英鎊），咁點解我唔自己買呢？的確，如果係打算長期玩的話，自己買機似乎係更好嘅選擇。但假若係平時唔多打機、只係有大作時同朋友一齊玩嘅人；又或者係屋企冇位長期放部PS5喺到嘅人；甚或只係想試下部PS5、或者PS VR2、PS Portal等好唔好用嘅人，租借服務其實就非常方便。

資料來源：Eurogamer、Automation