據消息人士透露，今次重啟將會更重視恐怖元素及忠於原作遊戲，希望唔會好似之前嗰幾部改到面目全非啦...

早先同大家報導過，持有《生化危機》電影版權嘅Constantin Film計劃再度翻拍呢個經典IP，並搵嚟憑住《Barbarian》一嗚驚人嘅新銳恐怖片導演Zach Cregger操刀，十畫未有一撇就吸引4間電影公司爭奪發行權，其中更包括Netflix及華納兄弟。經過一輪競購後，最後由發行過Paul W. S. Anderson版及2021年重啟版嘅Sony Pictures奪得。

據了解，Zach Cregger除咗擔任導演，仲會聯同《John Wick 3 & 4》《Ballerina》編劇Shay Hatten共同撰寫劇本，Constantin Film負責製作及融資，而演員陣容方面尚未公布，預計今年夏季開拍，暫定2026年9月18日上映。

此前，Sony已經發行過兩個版本嘅《生化危機》真人版電影，最為人所知當然係由Paul W. S. Anderson執導，當成動作片咁拍嘅六部曲，雖然俾機迷鬧爆「掛羊頭賣狗肉」，但票房大賣所以長拍長有，6集合共收得13億美元。後來Sony喺2021年又出咗部重啟作《生化危機：歡迎來到浣熊市（Resident Evil: Welcome to Raccoon City）》，試圖還原遊戲第一及二集故事，點知角色造型及設定魔改太勁，結果票房口碑雙雙仆直。唔知今次轉行驚慄路線，又會唔會得到原作黨嘅歡心呢？