雖然《沙丘瀚戰2》同《沙丘瀚戰3》故事相隔12年，但影迷可能唔使好耐就有得！最近外媒《Deadline》收到風，原定明年開拍嘅第三部曲《Dune Messiah》，將提前至今年夏天正式開拍，若然一切順利，有望在2026年聖誕節前上映。

去年10月導演Denis Villeneuve曾表示第三部曲《Dune Messiah》（下稱沙丘瀚戰3）預計2026年先開拍，但今個月出席土星獎頒獎典禮活動時突然改口風，表示自己本來想拍下其他嘢，但上年暑假休息時突然靈感湧現，令佢改變主意繼續完成《沙丘瀚戰3》，仲話見到《沙丘瀚戰2》深受全球影迷歡迎，令佢非常感動，並認為自己有責任完成呢個故事。

而且Denis Villeneuve嘅籌備速度似乎比預期中快，外媒《Deadline》記者Baz Bamigboye日前出席BAFTA（英國電影學院獎）前夕派對時，就打聽到《沙丘瀚戰3》將於今年6月正式開鏡，並非原定嘅2026年。若然消息屬實，咁《沙丘瀚戰3》有望在2026年聖誕節前就上映。

順帶一提，Denis Villeneuve已表明《沙丘瀚戰3》將會係佢最後一部沙丘瀚戰電影，事關後續小說非常深奧難以改編，而且佢好想拍下其他項目。不過，佢仍然望有人能夠繼續翻拍落去，並貼心咁話自己會喺第三集埋好伏筆，好讓其他導演接手。

《Dune》原著小說共有6本書

電影《沙丘瀚戰3》將改編自原著小說第二本書《Dune Messiah》（電影首兩部曲都係改編自第一本書），故事設定在首部小說12年後，講述Paul Atreides已經成為宇宙中嘅皇帝，但發現自己嘅權力並冇帶嚟想像中嘅和平，反而引起更多衝突...。