憑HBO劇集《Euphoria（毒癮女孩）》一炮而紅嘅Sydney Sweeney近年極速上位，相繼出演《Madame Web（蜘蛛夫人）》和《Anyone but You（真的狠愛你）》及《Immaculate（鬼聖胎）》等大銀幕作品，成為荷里活新生代人氣女星之一。不過，最近有位資深荷里活女監製就公開批評Sydney Sweeney唔靚又戲屎，完全唔明對方點解會紅。

曾有份製作《Father of the Bride（呷醋外父）》、《Buffy the Vampire Slayer（魔法奇兵）》嘅資深荷里活監製Carol Baum日前接受影評人Janet Maslin訪問時表示：「近期有一位女演員深受大家喜愛—Sydney Sweeney，所以我早排喺飛機睇咗對方主演嘅《Anyone but You》，想知道佢係邊個，同埋大家點解會談論佢，但好抱歉，我無法睇完呢套不堪入目（unwatchable）嘅電影。」目前於南加州大學電影藝術學院兼任教授嘅Carol Baum繼續表示：「我曾經問過我嘅學生，呢個女仔唔靚又唔識做戲，點解佢會咁紅？結果冇人答到我。」

Carol Baum公開批評後，Sydney Sweeney就透過發言人回應表示：「一個能夠分享專業知識及經驗嘅女性，卻選擇去批擊另一名女性。如果咁做係佢打滾業界幾十年所學到嘅嘢，並認為呢個行為適合教導學生，咁真係好可恥。如此不公地貶低另一位女監製（Sydney Sweeney於《Immaculate》兼任監製），充分反映出Baum女士嘅人格。」

對此，有網民就認為Carol Baum無需咁尖酸刻薄批評Sydney Sweeney外表，如果唔認同佢嘅演技可以唔揀佢。不過都有網民認同現時好多年輕男女演員，係因為外表都政治立場而走紅，與能力無關。唔知大家又覺得Sydney Sweeney係咪真係咁差呢？