2022年3月奧斯卡頒獎典禮上，主持人Chris Rock因取笑Will Smith妻子Jada Smith嘅光頭造型，引致Will Smith立即起身上台掌摑Chris Rock一事，相信大家都仲記憶猶新。而近日Jada Smith為咗即將推出嘅自傳而接受《PEOPLE》雜誌訪問，期間再次提到掌摑事件，並指Will Smith當日之所以咁嬲，似乎唔只係因為「光頭玩笑」嘅原因。

Jada Smith於訪問中表示：「我估我同Chris之間，可能有啲早在2016年發生嘅誤會，我估佢可能覺得被冒犯，而我係無心嘅。」Jada Smith提到嘅，應該係2016年時，雖然Will Smith於電影《Concussion》有亮眼表現，但就未獲奧斯卡提名，加上當年獲提名男女主角、配角嘅清一色係白人演員，所以Jada Smith公開支持「#OscarSoWhite」行動，呼籲大家杯葛當年嘅頒發典禮，而Chris Rock就係當年嘅主持人。Chirs亦於今年稍早嘅Netflix脫口秀中，表示當年Jada Smith曾呼籲佢辭去主持人一職。

「我可能沒為意當時佢所承受嘅壓力，」Jada Smith於《PEOPLE》訪問中提到，但佢亦指出當年頒獎禮後，佢與Chirs有通過一次電話，大家互相道歉，並認為「事情已經過去。」

Jada Smith坦承，當日的確被Chris Rock嘅光頭笑話傷到，但佢理解Chris Rock當時嘅身份。「搞笑藝人就係要做呢啲。我唔係想批判其他人如何表達及表現自己嘅藝術。我只係想講，類似嘅事件有幾次真係傷害到我感情，而Chris亦傷害過我好多次。但講到尾，作為聚光燈下嘅人，發生呢啲嘢都唔係好出奇啫。」

佢亦提到當日掌摑事件發生後，Chris Rock於現場就曾經嘗試向佢道歉，「佢黎到台邊嘗試道歉，『我唔係想傷害你』，我回答：『Chris，我依家唔想同你講呢啲』我以為 (Will Smith大怒) 係因為2016年嘅事以及……佢哋兩個於80年代嘅恩怨，我只可以由得Will同Chris自己傾掂佢，但佢哋肯定都有其他嘢忙。」

另外Jada Smith亦指，過去幾乎每個夏天都會有佢同Will Smith要離婚嘅傳聞，有次Chris Rock信以為真，仲想約佢出街。「某個夏天，Chris以為我同Will真係離婚，所以佢打黎話：『我好想約你出街』，我問：『你講緊咩呀？』Chris回答：『你同Will唔係離婚啦咩？』我回答：『唔係呀，Chris，只係傳聞咋。』佢非常驚訝並不停道歉。」

資料來源：PEOPLE