永井豪老師曾經創作過多部機械人動畫，其中代表中之一《鐵甲萬能俠》於2022年迎來播出50週年時，就曾經推出過大量慶祝計劃。而黎緊嘅2025年，就係永井豪老師另一經典作品《三一萬能俠》嘅50週年，理所當然地亦會有一系列慶祝活動。其中電影公司BIGONE於日前公佈會於2025年推出三一萬能俠真人電影，更立即開始試片嘅眾籌工作，喺短短兩日內就達成500萬Yen目標。

BIGONE於本週二時宣佈，會於2025年推出真人版三一萬能俠電影，並交由曾創作「銀假面」及「紅色巴隆」真人版電影嘅岡部淳也擔任監督及腳本。並同時公開咗電影版嘅三一萬能俠機體設計。電影版嘅設計比較接近《真．三一萬能俠》，都係充滿未來感及細節嘅風格，而且一號機睇落非常健碩。

而喺電影真正見街之前，BIGONE就舉行咗個眾籌計畫，希望先籌到500萬Yen拍攝一條長3-5分鐘嘅試片。所謂嘅試片除咗可以當係預告之外，更重要嘅係畀製作團體嘗試處理拍攝正式拍時會遇到嘅問題，特別係特效嘅部份。BIGONE於Camp-fire眾籌頁面上就得別提到，佢哋想嘗試展現三部機嘅合體機制，敵人「機甲龍」嘅設計，以及如果打打下想由一號機變身二號機又應該點呈現等。另外如果到時搵到適合嘅真人演員，亦會出現於試片之中。

目前眾籌項目而超出BIGONE嘅500萬Yen目標，籌得過千萬Yen。

資料來源：Getterrobo.jp