著名遊戲開發商Blizzard 今日突然宣佈，與中國網易嘅授權發行合約於明年1月23日到期後，將不會續約，換言之中國玩家自明年一月起，就冇辦法再玩到由網易代理嘅Blizzard遊戲，當中包括《World of Warcraft (魔獸世界)》、《Hearthstone (爐石戰記)》、《Diablo (暗黑破壞神)》、《Starcraft (星海爭霸)》以及《Overwatch (鬥陣特攻)》等多款知名遊戲。

Blizzard自2008年就將旗下遊戲嘅中國區發行、營運交予網易負責，而據Blizzard嘅新聞稿指出，今次之所以選擇唔同網易續約，係因為「無法與網易達成一個符合Blizzard的營運原則，及對玩家、員工承諾的交易」。而網易方面就先後出咗兩份新聞稿解釋事件，第一份指出雙方「無法就營運條款達成共識」，而第二份英文新聞稿就強調，失去與Blizzard的合約並不會對其財務報告造成「實質性影響」，但消息一出，網易嘅股價隨即下跌超過10%。

圖片：Activision

Blizzard方面亦指出，將於未來數日正式停售各款遊戲，但部份遊戲嘅資料片，如《WOW: Dragonflight》亦會繼續推出。玩家們將於數日內得知停運嘅安排。佢哋亦指出，會於未來尋找其他方法，重新為中國玩家提供遊戲。而早前推出，由Blizzard與網易聯合開發嘅手機遊戲《Diablo: Immortal》，因為有另一份專屬合約，所以不受此次停止合作影響。

近年中國政府對於民眾、特別係年輕人打機似乎相當唔順眼，先後推出多條法例限制年輕人打機時間，不過中國年輕人或者要更擔心「冇機打」嘅問題。

資料來源：Activision