一項大型研究顯示，全球男性精子數量喺過去不足50間大跌超過6成，而且下跌速度越嚟越快。專家表示若不採取行動解決精子數下降問題，人類恐面臨繁衍危機。

一份刊登於《Human Reproduction Update》嘅研究報告顯示，1973年至2018短短45年間，全球男性精子濃度下跌52%，平均精子數目更下跌高達62%，由每毫升精液1.01億粒精子跌至4900萬。令人擔憂嘅係，1973年至2000年全球男性精子下跌率約每年1.16%，但到咗2000年後下跌率已提升至2.64%，反映下跌情況正在加速、越嚟越嚴重。

對此，研究員Hagai Levine教授坦言：「我認為呢個現象代表地球出現了問題，精子濃度下降係一場危機，如果唔妥善解決，可能會走向不可逆轉嘅結局。」另外，愛丁堡大學男性生殖健康專家Richard Sharpe則表示，精子濃度下降，意味住夫妻需要更長時間備孕。

雖然目前尚未清楚背後原因，但有專家推測同干擾內分泌嘅化學物質（燃燒化石燃料產生嘅污染物、塑膠器皿等）以及環境因素有關。另外，吸煙、飲酒、肥胖及不良飲食習慣亦會導致精子量下降。