日本組合乃木坂46，由2011年出道以來就以「AKB48官方對手」，以及「平均高顏值」而著稱，雖然往後都有唔少新成員加入，但一眾「一期生」於Fans心目中依然有不可動搖嘅地位。不過近年多位「一期生」都宣佈畢業，近日連一期生中最年輕、12、3歲就出道嘅齋藤飛鳥都宣佈會於年尾退團，一期生僅餘現任隊長秋元真夏尚在團中。

齋藤飛鳥日前於官方部落格上，無預警發出畢業宣告。於帖文中，齋藤飛鳥指出過往即使其他成員宣佈畢業，佢都從來唔會提到「畢業」呢個詞，不過「現在到了我要用上這個詞的時候」，並宣佈會於本年尾推出團體第31隻單曲後退團。接下來嘅段落中，齋藤飛鳥交待自12、3歲就出道後嘅經歷與感想，亦表達咗對幕後人員及Fans嘅謝意。尾段再表示團體活動會到今年年尾結束，而畢業演唱會就會於明年舉行，不過目前未有詳情。

當年乃木坂46嘅一期生中，曾經雲集白石麻衣、西野七瀬、生駒里奈、生田絵梨花、松村沙友理等美女。而隨住齋藤飛鳥宣佈退團，加上另一名一期生和田真彩即將於12月4進行最後一次團體活動，乃木坂46嘅一期生中，將會只餘現任隊長秋元真夏尚在團中。

資料來源：乃木坂46官網