去年上映嘅《Spider-Man: No Way Home》搵黎前兩任蜘蛛俠Tobey Maguire及Andrew Garfield回歸，三代蜘蛛俠同堂充滿話題性之餘票房亦順利大收，加上MCU近年主題為多重宇宙，Fans都非常期待兩名「前任」會再次於MCU作品中出現。而據近日外媒報導，三代蜘蛛俠的確有機會再聚一堂——又或者準確啲黎講，係佢哋把聲有機會重聚一堂。

卻說Marvel及Sony於2018年推出動畫電影《Spider-Man: Into the Spider-Verse》後大受歡迎，於是早前就宣佈會開拍兩部續作，分別係預計2023年上映嘅《Across the Spider-Verse》及2024年上映嘅《Beyond the Spider-Verse》。而據報續集當中，將會有多達20名來自不同宇宙、有不同設定嘅「蜘蛛俠變體」登場。

而據《The Cosmic Circus》引述「多個知情人士」指，《Across the Spider-Verse》中除咗會有來自Playstation遊戲《Spider-Man》、由Yuri Lowenthal聲演嘅Peter Parker之外，亦會有MCU版本，即係Tom Holland飾演嘅Peter Parker登場。不過目前就未知Tom Holland會否親自為角色配音，亦未知故事會否與《No Way Home》有所連結。

另一邊廂，《The Cosmic Circus》於同一篇報導中，亦指「其中一個知情人士」透露，Tobey Maguire及Andrew Garfield兩個版本嘅蜘蛛俠亦有望加入《Spider-Verse》電影，但目前未知會係第二集《Across the Spider-Verse》定第三集《Beyond the Spider-Verse》，亦未知兩名演員會否親自為角色配音。換言之最好嘅情況，就係Tobey Maguire、Andrew Garfield及Tom Holland三個版本嘅蜘蛛俠都於同一部《Spider-Verse》電影中登場，同時三名演員又親自為角色配音，再次上演三代同堂。