隨住日元持續疲弱，愈嚟愈多日本內銷遊戲主機被轉賣到海外，其中大半更係出口到中國，每部轉手至少賺HKD$2,000！

據《日本經濟新聞》報導，由於日元眨值，日本當地遊戲機售價比起其他地區更為便宜，從而吸引消費者(黃牛)紛紛將主機轉賣到海外，其中絕大部份係賣到中國，事關日版遊戲機規格同中國版無異，就連電源插頭都一模一樣，而且運輸成本比較低。

以PS5光碟版主機為例，日本建議零售價為54,978日元，折合約2,675人民幣，而中國售價則為4,299元，即使原價轉賣，齋計匯率都賺1,624元人民幣。但實際上又點會原價轉手呢？據現時中國PS5行情，大部份「日版PS5」都能夠以超過5,000元人民幣出售，換言之計計埋埋每部PS5能夠賺超過2,000人民幣。

產量少加上黃牛猖獗，睇嚟想以原價入手，又抽唔到籤嘅真．玩家仲有排等。