年頭推出嘅《Elden Ring》大受歡迎，就算本來唔係「魂系Fans」嘅玩家都紛紛入坑，更早早被認為係2022年年度遊戲大熱之選，連帶其製作公司、由著名遊戲製作人宮崎英高領導嘅FromSoftware亦水漲船高。而日前From Software就宣佈，中國騰訊及索尼互動娛樂 (SIE) 會聯合入股公司，其中騰訊更會成為第二大股東。

From Software此前為日本著名出版集團「角川集團」全資擁有，而據FromSoftware官網發出嘅公告，中國騰訊旗下、香港註冊、主要發行手機遊戲嘅「樂娛互動娛樂 (Sixjoy)」將會與SIE一齊入股FromSoftware，其中Sixjoy將佔16.25%股份，而SIE則佔14.09%。不過角川集團亦以69.66%股權，繼續保持最大股東嘅身份。

或者係知道Fans們對於「中國騰訊」同「手機Game」嘅恐懼，所以公告中亦特登寫明：「過去廿年我哋都以獨立嘅價值觀及自主性開發遊戲，股權改變後亦會繼續於遊戲開發、用戶溝通、平台選擇上保持獨立性及自主性。」簡單黎講即係同Fans們保證「一切都冇變！」

冇變咁做咩要畀人入股呢？FromSoftware畀出嘅答案係：「有呢筆資金，就可以更積極地開發遊戲，並通過兩間公司嘅技術支持及開發合作，將高質量遊戲帶畀更多玩家。」

資料來源：FromSoftware