自從Amber Heard早前輸咗單誹謗案之後，大家一直都好關心事業基本玩完、又爭落一身「街數」嘅佢，究竟賠唔賠得出千幾萬美金畀Johnny Depp (都唔好講佢仲話要上訴)。但大家唔使擔心啦，因為傳聞有片商願意出900萬美金，力邀Amber Heard演出——不過唔係啲咩荷里活大片，而係成人電影，即係AV呀！

圖片：《GQ》

據外媒報導，傳聞AH嘅律師Elaine Bredehoft，早前收到封來自成人模特兒經理人及製作公司「Zen Models」主席Veronica Madjarian嘅信，信中出價900萬邀請AH下海拍攝一部AV，當中有800萬係AH本人嘅片酬，差啲就能夠一鋪找清JD份賠償，另外100萬就會以AH名義捐畀洛杉磯兒童醫院——即係當日AH話會捐錢但最後冇捐，又死撐自己「打算捐=捐咗」嗰間——我分唔出究竟佢哋真係想幫AH定只係想串佢。

Amber Moore

圖片：Zen Models

據報Veronica Madjarian以及本身都係成人電影演員嘅公司發言人Amber Moore 仲拍咗條片，證實的確向AH提出過有關邀請，「本公司是為賦權予處身於成人娛樂業內的男女而設。我們決定向Amber Heard提出一個可以解決佢問題嘅可行方案」，而且「有多個曾獲獎嘅女性導演會為Amber Heard撰寫劇本」。另外佢哋睇完早排嘅審訊後，認為AH只係一個無知而且完全冇預計過會遭到大肆批評嘅「天真年輕女孩」，仲話如果AH上訴失敗，「呢個提議就可以容許佢放低影響佢進入新生活嘅負面評論。」

資料來源：Pop Topic