要數經典港漫，由牛佬於1992年創刊、歷經28年到2020年先完結嘅《古惑仔》絕對佔一重要席位，更透過電影成為香港人嘅集體回憶之一。適逢今年係《古惑仔》創刊30週年，銅鑼灣「揸Fit人」陳浩南重臨「舊地」，於Exhibit-Shop概念藝術玩具展覽店Amaz By Lokianno舉行《古惑仔三十載之氣吞銅鑼灣》展覽，展出多項《古惑仔》的珍藏品及主題精品，Fans們不能錯過啦。

是次展覽中設有多個打卡位，包括主筆倫裕國為了今次展覽，親手重新繪畫嘅「福田千人大戰」牆身，另外亦有以「關公」、「新孔雀夜總會」、「黑夜的銅鑼灣」及「陳浩南的龍紋身」等漫畫經典畫面製成嘅巨型燈布畫作；場內亦還原「銅鑼灣」街道牌、「新孔雀夜總會」門外的代客泊車、龍頭椅及大排檔等場景，令漫畫迷能夠置身於陳浩南嘅世界。

同時場內亦展出30年前嘅《古惑仔》原版創刊號以及原稿作品，又請來劍僑、戇男、邱福龍、鄺志德、吳文輝、牛輝、袁家寶、許景琛、黃毅、黃洋達、man僧、謝菲12位港漫主筆，重新演繹「陳浩南」一角。

倪匡先生題字嘅漫畫第2276期封面

「細細粒」FlashPrint

一個展覽除咗有嘢睇，當然要有嘢買。場內就會出售《古惑仔》原稿創刋號神秘禮盒 (限量400套)、附上獨立證書及獨立編號，會場限定附送陳浩南畫板嘅盲盒手錶 (一套6款，限量100套)、兩款30週年簽名板 (各限100套)、30週年 陳浩南紅酒禮盒特別版（限量100套），以及口罩、T恤等週邊。

另外較為特別嘅就有當年得到倪匡先生題字嘅漫畫第2276期封面，是次展覽就會整成版畫出售；而Amaz亦會利用獨家代理嘅日本打印技術FlashPrint，製作出唔同角度睇會有唔同圖像嘅「陳浩南」、「細細粒」和「丁瑤」畫作，而且講到明「只准18歲或以上人士觀看」，我就真係好想睇下細細粒嗰張會係咩樣啦。

日期：即日起至8月21日

地點：Amaz by Lokianno - AMAZ Gallery（銅鑼灣Fashion Walk京士頓街2-4號地下及地庫）

時間：中午12時至晚上9時

費用：免費入場參觀