上月我曾同大家報導過，有網民發現任天堂為咗下年上映嘅《Super Mario Bros.》電影成立咗「Nintendo Studios LLC」及「M Brothers Production LLC」兩間公司，當時就已經有人估計任天堂嘅野心不僅一部電影。而近日再有消息傳出任天堂收購咗一間知名CG動畫公司，似乎就係正式啟動「任天堂電影宇宙」嘅第一步。

據《Comicbook》報導，任天堂近日公佈有意全資收購曾經參與製作Netflix動畫《攻殻機動隊：SAC_2045》以及吉卜力動畫電影《安雅與魔女》嘅CG動畫製作公司「Dynamo Pictures」，預計收購會於今年10月3日完成，收購後Dynamo Pictures會成為任天堂旗下子公司，並改名為Nintendo Pictures Co. Ltd」，未來將會集中於創作更多任天堂IP電影，換言之任天堂明顯地唔滿足於淨係將《Super Mario Bros.》電影化，相信其他任天堂角色嘅電影將會陸續有來，甚至仲可能有個「任天堂明星大亂鬥」？

目前任天堂就冇公佈任何其他電影嘅製作，所以官方層面上唯一一部任天堂電影就係下年上映、連宣傳圖都冇張嘅《Super Mario Bros.》。不過早前亦有傳聞指出《Donkey Kong》會喺任天堂下一個電影化嘅人物。唔知大家對於「任天堂電影宇宙」又有幾期待呢？