自從Amber Heard於誹謗案敗訴後，其演藝生涯基本玩完、又要面臨1035萬賠償、再加天價律師費，唔使會計師核數都知佢面臨巨額財困。早前有小報指AH打算靠個老豆疑似係Elon Musk嘅女獲得財政保障，近日外媒報導又指佢打算出書盡爆與Johnny Depp嘅內幕，祈求以版稅增收入。但有專家就認為佢只係飲鴆止渴，分分鐘搞出更大個爛攤子。

圖片：AFP

據美國雜誌《OK!》引述「AH身邊人士」指，AH認為自己嘅演藝生活「已經玩完」、「冇嘢可以輸」，加上面對巨大財政壓力「已經冇哂錢，亦冇資格拒絕任何收入」，所以當有出版商搵佢出書時，AH「感到非常興奮」。據知AH與出版商目前已在商討之中。

順帶一提，當日審訊期間AH曾被網民捉到於庭上扮抄Notes

但當初AH之所以會被JD控告誹謗，就係因為一篇於《The Washington Post》上發佈嘅專欄文章，當中不指名道姓地指JD家暴，而且出街之前已經搵過律師確保 (應該) 唔會出事，但最後依然令AH要賠償過千萬美金。如果依家AH再出書談論JD，可以想像JD團隊一定會睇哂每一隻字，搵出所有可能構成誹謗嘅段落再告多次，換言之AH隨時再輸官司再賠錢。到時就真係唔知佢仲有咩可以出賣啦。

資料來源：OK!