隨住《Monster Hunter Rise》大型擴充內容《Monster Hunter Rise: Sunbreak》將於月底推出，最近又多返人討論「芒亨」，各位機迷係咪已經準備好屠龍呢？日前CAPCOM就出咗款搞笑抱枕，以等比例還原遊戲內嘅生肉/全熟肉，齋睇圖都聞到陣香味！

據官方介紹，抱枕以聚氨酯(PU)製成，長89cm、寬23cm、厚17cm，分別有生肉及全熟肉兩個版本。從圖中可以見，抱枕無論係骨頭形狀定抑或肉紋都做得相當逼真，令人望到就想大咬一啖，當成擺設亦都趣味十足，有興趣嘅朋友可以到CAPCOM網店了解更多，售價為16,280日圓（約$945港幣）。