唔經唔覺，史詩奇幻電影《魔戒》系列已上映20周年，日前飾演主角佛羅多嘅Elijah Wood接受雜誌《Esquire》訪問時就突然老實自爆，其實佢仲未睇完原著小說！

雖然聽落令人難以置信，但Elijah Wood確實承認自己20年嚟都未睇完原著，尤其知道其他劇組人員都睇過晒，佢就更加唔好意思。Elijah Wood就解釋由於原著密集且冗長，如果要同時閱讀原著加準備角色會非常費力，所以佢選擇咗專注喺劇本嘅部份。最終結果大家都有目共睹，佢嘅精湛演技為影迷留下深刻印象，更憑住第二部曲《王者再臨》獲得土星獎最佳男主角殊榮。

順帶一提，為咗令觀眾唔使等超過一年就睇到續集，當年「魔戒三部曲」係用咗大約14個月一次過拍晒，所以都唔怪得Elijah Wood話冇時間睇嗰套成千幾頁嘅原著。希望有朝一日Elijah Wood會睇晒原著，然後同大家分享下佢所演嘅佛羅多同原著有咩唔同。