唔經唔覺，原來大家已經戴咗口罩差唔多兩年，唔係大家呢段時間有冇發掘到口罩除咗防疫以外嘅好處呢？（又或者壞處居多）最近有日本調查顯示，即使疫情消退，超過8成日本人都可能會繼續戴口罩，原因或同當地文化有關。

飯豊まりえ

最近日本美妝雜誌《VoCE》訪問咗72位10幾至50幾歲嘅讀者，當中超過9成人都認為戴口罩好處多過壞處，而且仲覺得好舒服。咁當然啦，只係訪問咗72人確實有啲少，但結果就同今年4月市場調查公司Planet得出嘅數據大致相同。

松本若菜

早於今年4月，日本市場調查公司Planet就訪問咗4,000人如果疫情消退，會唔會繼續戴口罩，結果顯示有24.5%人堅決繼續戴口罩，47.8%人表示可能會繼續戴口罩，視乎實際情況，例如喺人多擠迫嘅地方或者流感季節。另外有11.8%並唔係真係咁想戴口罩，但如果其他人戴，佢都會戴埋一份。剩低嘅15.9%人就表示疫情過後會完全唔戴口罩。

兩個調查嘅受訪者都分別指出，戴口罩能夠掩蓋臉上嘅瑕疵，又可以唔使化妝，亦有男受訪者表示可以唔使剃鬚。另一方面，口罩可以隱藏臉部表情，意味住出席社交場合嗰陣唔使成日Chok個假笑樣應酬，同時唔怕真實情緒會唔覺意喺臉上流露出嚟。唔知大家理唔理解呢種心理呢？

資料來源：yahoo.jp、Planet