陪伴大家超過20年嘅《侏羅紀公園》系列，終於嚟到最後一集《侏羅紀世界：統治霸權（Jurassic World：Dominion）》！今日官方就無預警咁公布咗一段5分鐘「序幕片段」，帶大家穿越到白堊紀時期，展示多款過往從未出現過嘅新恐龍品種，預計出年6月9日正式上映。

條片一開波就帶大家穿越到6,500萬年前嘅白堊紀時期，啲恐龍浩浩蕩蕩多到好似睇緊國家地理頻道咁樣，當中更有多款從未出現過嘅恐龍品種（e.g.有羽毛嘅恐龍），同時致敬隻蚊吸恐龍血嘅情節。然後畫面一轉就返翻現代，見到一隻暴龍闖入露天汽車戲院，人類隨即展開追捕。

今部電影將由第一集《侏羅紀世界》導演Colin Trevorrow回歸執導，並聯同《悍戰太平洋2（Pacific Rim：Uprising）》編劇Emily Carmichael共同撰寫劇本，除咗有《侏羅紀世界》班底「星爵」Chris Pratt、Bryce Dallas Howard、Daniella Pineda回歸演出，就連《侏羅紀公園》第一集經典人物Laura Dern、Jeff Goldblum、Sam Neil都會再度同框，令人充滿期待。

順帶一提，官方表示呢條片純屬宣傳，當中片段唔會收錄喺正片入面。

《侏羅紀公園》第一集經典人物，從右數起分別Laura Dern、Jeff Goldblum、Sam Neil。（圖片截至：IMDB）