由名導Ridley Scott操刀，集結Matt Damon、Ben Affleck及Adam Driver三位男星嘅中世紀騎士電影《The Last Duel（最後絕鬥）》，雖然獲得大量好評，但可惜叫好不叫座，投資過億美元製作全球只收2740萬美元。對於票房慘遭滑鐵盧，Ridley Scott就認為原因同年輕人鍾意玩手提電話有關...

最近Ridley Scott接受Podcast節目《WTF with Marc Maron》訪問，期間談及到《The Last Duel》票房失利問題。當主持人Maron暗示成因可以同公司決策有關嗰陣，Ridley Scott就馬上澄清迪士尼喺宣傳工作方面做得非常好，而且高層都好鍾意呢部電影，廣告同宣傳都做得非常出色。

Ridley Scott認為主要原因係出於年輕人鍾意玩手提電話「我哋目前所面對嘅，係一班玩手提電話大嘅觀眾，呢班千禧一代根本唔想學習任何嘢，除非你透過電話直接話畀佢知。」不過佢就冇因此感到遺憾「我同電影公司Fox（即二十世紀影業）都覺得劇本唔錯，然後又成功拍到出嚟。你總唔能夠每部作品都大賣，我拍咁多部電影從來都冇遺憾過。」唔知大家又覺得後生仔鍾意玩電話，同唔鐘意睇相對文藝嘅電影又有冇關係呢？

《The Last Duel》由Ridley Scott執導，Matt Damon及Ben Affleck兩位奧斯卡得主自編自演，改編自法國14世紀一場真實比武審判，劇情講述一位騎士為妻子嘅名譽，不惜向出生入死嘅好兄弟提出決鬥，從而探討當中嘅愛恨情仇以及展示當時社會對女性嘅不公。