自2008年《Iron Man》上映以嚟，MCU電影帶挈過唔少影星（或者叫相輔相成），先係帶領Robert Downey Jr.走出人生低谷邁向第2次事業巔峰，並將Chris Evans塑造成深入民心嘅「美國隊長」，又將當年寂寂無名Tom Holland變成風靡萬千少女嘅「蜘蛛俠」。之不過現年25歲嘅Tom Holland就唔想因此而被定型，希望跳出舊有框框嘗試新戲路。至於想演啲咩呢？老友Jacob Batalon就大爆Tom Holland成日都話想做James Bond！

19歲就披上「蜘蛛俠」戰衣嘅Tom Holland，如今終於迎來同Marvel最後一份合約《No Way Home（不戰無歸）》。佢近日接受《GQ》Men of the Year系列專訪時就提起往後去向，認為係時候放低包袱繼續前行，並表示「對於《蜘蛛俠》系列嚟講，最好嘅發展或者係拍一部Miles Morales（黑人蜘蛛俠）電影。」同時強調唔想做死一世蜘蛛俠「如果我30歲後仲扮演緊蜘蛛俠，咁我就真係做錯喇。」

《Uncharted》劇照

雖然角色受歡迎固然係好事，但有時形象太過深殖人心，對於不斷追求破格嘅演員嚟講反而係一種制肘，就算再演其他角色都好難令觀眾產生共嗚，所以Tom Holland會有相關擔憂都好合理嘅，而佢最新一部「破格」之作《Uncharted（秘境探險）》亦將於2022年2月上映，到時將會帶領觀眾上天下海走遍全球尋找寶藏。

Tom Holland好友Jacob Batalon

至於Tom Holland更大嘅野心，就被好友Jacob Batalon喺訪問期間爆響口，指佢成日都話要做James Bond，隨即引起唔少網民討論，唔知大家又覺得佢啱唔啱做007呢？順帶一提，早前007電影監製Barbara Broccoli表示，等到2022年先會物色下任James Bond，換言之有排先知道人選。