「遊戲改編」嘅影視作品素來都不罕有，但要數到無論Fans定普通觀眾都覺得好睇嘅……我就真係一套都諗唔起。不過，最近於Netflix開播、改編自人氣電腦遊戲《League of Legends》嘅動畫影集《Arcane (中譯：奧術)》，就於Rotten Tomatoes獲得幾乎滿分嘅超好評，甚至被評為今年最好嘅「美劇」之一！

《League of Legends》嘅開發商Riot Games整遊戲平衡就一直被人鬧，但佢哋整動畫就一直非常用心而且高水準。《Arcane》嘅起緣其實要講到2013年Riot為《LOL》新角色「Jinx (吉茵珂絲)」整嘅宣傳動畫MV，當時憑出色嘅製作大獲好評，大家就開始叫Riot為《LOL》出劇集。等咗8年、中間Riot出過N條新角色宣傳動畫之後，《Arcane》終於面世。

《Arcane》實際上係《LOL》中多個角色嘅起源故事，主角當然有孤兒Jinx，亦有視為姐姐嘅Vi (菲艾)、發明家Jayce (杰西)、維克托 (Viktor)、女警凱特琳 (Caitlyn)等等。製作方面由法國動畫公司Fortiche Productions，亦即係當年Jinx條MV嘅製作公司負責，經過八年進化後 (以及多次與Riot合作後) 其技術更上一層樓，單論畫面及美術風格而言，《Arcane》幾乎係無可挑剔。

但《Arcane》高分嘅原因唔係單靠畫面，亦絕非因為冧得掂啲Fans，而係Riot為眾多角色建構出一個完整而不失俗套，甚至仲有啲感人嘅故事。故事發生於高科技都市皮爾托福 (Pitover) 以及其地下貧民區佐恩 (Zaun)之中，年幼嘅Vi及Jinx係佐恩反抗上層幫派嘅領導人嘅女，Vi身手矯捷深得同伴信賴，Jinx卻年幼力弱急於證明自己，結果卻意外釀成慘劇，遭逢巨變後變得精神失常，脆弱之時，敵對幫派兼殺父仇人卻收留咗佢，將佢培養成成為遊戲中個瘋女孩Jinx。

同時上層亦因為對「魔法」嘅研究而產生分歧。年輕發明家Jayce發明出結合魔法與科技嘅「海克斯科技」，成為上層嘅議員並捲入政治與貪腐之中，漸漸遠離當初「造福人群」嘅初心。同伴Viktor卻因病命不久矣，盡最後一口氣研究。出身於貴族家庭嘅Caitlyn一心為民服務而成為警察，因緣際會下救Vi一命而成為好友，亦因而了解到上層風光背後嘅代價。